កណ្តាល៖ អង្គភាពប្រឆាំងអំពើពុករលួយ (ACU) បានកោះហៅ ប្រធានមន្ទីរបរិស្ថានខេត្តកណ្តាល លោក ពៅ សោមាណាក់ ឱ្យចូលមកបំភ្លឺករណីពីភាពមិនប្រក្រតីមួយចំនួនពាក់ព័ន្ធនឹងការបំពេញភារកិច្ចរបស់លោកឱ្យបានឆាប់។ នេះបើតាមលិខិតរបស់ ACU ផ្ញើទៅលោក ពៅ សោមាណាក់ កាលពីថ្ងៃទី២៨ ខែធ្នូ ឆ្នាំ២០២២។

អ្នកនាំពាក្យអង្គភាពប្រឆាំងអំពើពុករលួយ លោក សយ ច័ន្ទវិចិត្ត បានបញ្ជាក់មក EAC news ឱ្យដឹងតាមទូរសព្ទនារសៀលថ្ងៃទី១២ ខែមករា ឆ្នាំ២០២៣ ថា ប្រធានមន្ទីរបរិស្ថានខេត្តកណ្តាល លោក ពៅ សោមាណាក់ បានទទួលលិខិតស្នើសុំឱ្យចូលមកបំភ្លឺពីអង្គភាព ACU ហើយលោកក៏កំពុងតែរៀបចំឯកសារពាក់ព័ន្ធមកបំភ្លឺនៅ ACU។

អ្នកនាំពាក្យ ACU មិនទាន់អាចលម្អិតថា លោកប្រធានមន្ទីរបរិស្ថានខេត្តកណ្តាលនឹងចូលមកបំភ្លឺនៅថ្ងៃណានៅឡើយទេ ខណៈអង្គភាព ACU កំពុងតែបន្តកិច្ចស្រាវជ្រាវលើករណីលោក ពៅ សោមាណាក់ ដែលត្រូវបានចោទប្រកាន់ពីករណីយកលុយពីមន្ត្រីមិនមកបំពេញការងារក្នុងម្នាក់ ចំនួន ២០០ដុល្លារអាមេរិកក្នុងមួយខែ ការកិបកេងថវិការៀបចំថ្នាលបណ្តុះកូនឈើ ដែលក្រសួងផ្តល់ជូនមន្ទីរចំនួន ៥៩លានរៀលជាប្រយោជន៍ផ្ទាល់ខ្លួន។

រួមជាមួយនឹងបញ្ហាឲ្យមន្ត្រីទាមទារថ្លៃសេវារៀបចំឯកសារកិច្ចសន្យាការពារបរិស្ថាន ពីសិប្បកម្ម អាជីវកម្ម លើសតម្លៃសេវា របស់រដ្ឋ ព្រមទាំងយកប្រាក់ប្រចាំខែពីសហគ្រាស រោងចក្រ អាជីវកម្ម សិប្បកម្ម ជាច្រើនកន្លែងជាថ្នូរនឹង ការមិនចាត់វិធានការច្បាប់។

អ្នកនាំពាក្យបានថ្លែងដូច្នេះថា៖ «ជាជំហានដំបូង អង្គភាពប្រឆាំងអំពើពុករលួយ ឱ្យគាត់ចូលមកបំភ្លឺ ហើយយើងនឹងពិនិត្យមើល និងពិចារណាថាត្រូវសម្រេចបញ្ចប់នីតិវិធី ឬត្រូវបន្តនីតីវិធីទៀត»។

គូសបញ្ជាក់ថា អង្គភាពប្រឆាំងអំពើពុករលួយបានទទួលពាក្យបណ្តឹងលើលោក ពៅ សោមាណាក់ ប្រធានមន្ទីរបរិស្ថានខេត្តកណ្តាលកាលពីថ្ងៃទី១៥ ខែធ្នូ ឆ្នាំ២០២២៕